Fyrir þremur árum kvað Samkeppniseftirlitið upp þann úrskurð að fyrirtækið Vélar & Verkfæri ehf, hefði misnotað einokunarstöðu sem eftirlitið taldi fyrirtækið njóta á markaði fyrir efni til gerðar höfuðlyklakerfa. Skyldi fyrirtækið greiða 15 milljón króna sekt vegna þessa. Til skýringar eru höfuðlyklakerfi ein tegund aðgangskerfa, þar sem sami lykill (eða kort eða hvaða annar búnaður sem getur opnað hurð) getur gengið að fleiri en einni læsingu. Vélar & Verkfæri hafa í áratugi selt slík kerfi, sett þau saman og þjónustað. Fyrir nokkrum árum tók fyrirtækið að veita ýmsum þjónustuaðilum sínum heimild til að selja og þjónusta þessi kerfi og leiddi það til aukinnar samkeppni. Voru samningar við þessa þjónustuaðila kveikjan að málatilbúnaði SKE.